Isaiah 57

1Abalungileyo bayabhubha,
kodwa kakho ocabanga ngakho enhliziyweni yakhe.
Abantu abazinikele ekukhonzeni bayasuswa,
njalo kakho okuzwisisayo ukuthi
abalungileyo basuswa
ukuba baphetshiswe ebubini.
2Labo abahamba ngokulunga
bayangena ekuthuleni;
bathola ukuphumula belele ekufeni.

3“Kodwa lina wozani lapha lina,
madodana esanusekazi lina nzalo yezifebe leziphingi!
4Ngubani elimklolodelayo na?
Ngubani elimnemelayo
limkhuphela inlimi zenu?
Kalisinzalo yabahlamuki,
labantwana babaqamba amanga na?
5Liyatshiseka ngenkanuko ezihlahleni zomʼOkhi,
langaphansi kwezihlahla zonke eziyizithingithingi;
lenza umhlatshelo ngabantwabenu emakhelekehleni
langaphansi kwamawa.
6Izithombe eziphakathi kwamatshe abutshelezi emakhelekehleni yiso isabelo senu,
yizo, yizo eziyisabelo senu.
Yebo, kuzo lithele iminikelo yokunathwayo
lanikela leminikelo yamabele.
Ngenxa yalezizinto ngingaba lozwelo na?
7Wenze umbheda wakho phezu koqaqa oluphakemeyo,
wakhwela wayanikela imihlatshelo yakho khona.
8Ngemva kwezivalo zakho langemva kwezinsika zomnyango wakho
ubeke izifanekiso zakho zobuhedeni.
Wathi ungilahla wembula umbheda wakho,
wakhwela kuwo wawuvula waba banzi,
wavumelana lalabo othanda imibheda yabo,
wakhangela ubunqunu babo.
9Uye kuMoleki ulamafutha e-oliva,
wandisa lamakha akho.
Uthume izithunywa zakho khatshana
wangena ethuneni lona ngokwalo!
10Wadiniswa yizindlela zakho zonke,
kodwa wawungeke uthi, ‘Akusizi ngalutho.’
Wathola ukuvuselelwa kwamandla akho.
Ngakho kawuphelanga amandla.

11Ngubani omesabe kangaka
waze waba lamanga kimi,
njalo kawaze wangikhumbula
loba ukucabanga lokhu enhliziyweni yakho na?
Akusingenxa yokuthi sengathula okwesikhathi eside kakhulu
waze wangasangesabi na?
12Ukulunga kwakho lemisebenzi yakho ngizakuveza obala,
njalo akuyikukusiza ngalutho.
13Lapho usukhalela ukusizwa,
iqoqo lezithombe zakho kalikuhlenge.
Umoya uzazithatha zonke,
lokuphephetha nje kuziphephulele khatshana.
Kodwa umuntu owenza mina isiphephelo sakhe
ilizwe lizakuba yilifa lakhe
lentaba yami engcwele ibe ngeyakhe.”

Induduzo Kwabazisolayo

14Njalo kuzathiwa:

“Candani, candani, lungisani indlela!
Susani izikhubekiso endleleni yabantu bami.”
15Ngoba ophakemeyo ongaPhezulu,
yena ophila kokuphela, obizo lakhe lingcwele uthi:
“Ngihlala endaweni ephakemeyo lengcwele,
kodwa laye ozisolayo lothobekileyo emoyeni,
ukuba kuvuselelwe umoya wabathobekileyo,
kuvuselelwe lezinhliziyo zabazisolayo.
16Angiyikulisola kokuphela
kumbe ngihlale ngithukuthele,
ngoba umoya womuntu ungaphela phambi kwami,
umoya womuntu engawudalayo.
17Ngathukutheliswa yibuhwaba bakhe obubi;
ngamjezisa, ngafihla ubuso bami ngithukuthele,
kodwa waqhubeka ngezindlela zakhe zenkani.
18Izindlela zakhe sengizibonile, kodwa ngizamsilisa.
Ngizamkhokhela, ngimduduze futhi,
19ngenze ukubonga ezindebeni zabalilayo ko-Israyeli.
Ukuthula, ukuthula kwabakhatshana labaseduze,”
kutsho uThixo.
“Ngizabasilisa.”
20Kodwa ababi banjengolwandle olugubhazelayo,
olungeke luphumule,
amagagasi alo ephosa udaka lengcekeza phezulu.
21“Akukho kuthula kwababi,” kutsho uNkulunkulu wami.